Trike sumalpok sa bus: 3 todas

MANILA, Philippines — Tatlong katao na sakay ng tricycle ang nasawi matapos na sila ay bumangga sa bus kamakalawa ng gabi sa Purok Narra, Brgy. Quezon, Surigao City, Surigao del Norte.

Namatay noon din sa lugar ng pinangyarihan ang mga biktima na sina Arthur Manlimos, driver ng tricyle; at pasahero na sina Celeste Señahan at Gary Aguila, kapwa 43, ng Brgy. Cagniyog.

Sa ulat, bago nangyari ang aksidente ay sakay ang tatlong biktima ng tricycle na kung saan ay inoberteykan umano nito ang nasa unahang sasakyan na siya namang pagdating ng bus na minamaneho ni Alfonso Ledesma, 43 at sila ay nasalpok.

Sa lakas nang pagkakasalpok ay nayupi ang tricycle na agad ikinasawi ng mga biktima na nagtamo ng malulubhang sugat at pasa sa katawan.