Grab driver inaresto sa baril at granada

MANILA, Philippines — Isang Grab driver ang inaresto ng mga pulis nang mahuli sa kanyang pag-iingat ang baril at granada na dala niya habang siya ay namamasada sa New Manila Quezon City, kamakalawa.

Kinilala ang suspek na si Khalida Gonzales, 31, residente ng No. 69-C Boni Serrano St., Brgy. Bagong Lipunan, Quezon City na driver ng Grab Transport Network Vehicle Service (TNVS).

Batay sa ulat, inaresto dakong alas-4:40 ng hapon sa Broadway Ave. corner Aurora Blvd., Brgy. Valencia, New Manila, Quezon City ang suspek nang magbigay impormasyon ang isa nitong naging pasahero sa pagdadala nito ng baril makaraang makita na nakasukbit sa kanyang baywang.

Sinita ng mga tauhan ng District Support Operation Unit si Gonzales habang ipinapasada ang kanyang kulay gold  na Toyota Avanza na may plakang VZ-6496.

Nakuha mula sa suspek ang isang kalibre 45 baril na may pitong bala at isang MK2 hand grenade sa ilalim ng upuan ng sasakyan.

Walang maipakitang lisensiya at dokumento ang suspek sa mga nakuhang armas mula sa kanya kaya’t inaresto.