Garin, 37 pa muling kinasuhan sa DOJ
MANILA, Philippines — Muling sinampahan ng kasong kriminal sina dating Health Sec. Janette Garin at 37 iba pang dating opisyal ng pamahalaan na sangkot sa kontrobersyal na anti-dengue Dengvaxia vaccination program noong panahon ng Aquino administration.
Kasama si Public Attorney’s Office (PAO) chief Persida Acosta sa Department of Justice (DOJ) ng pamilya ng pang-11 biktima ng Dengvaxia vaccine na si Michael Tablete sa pagsasama ng mga kaso laban sa mga respondents.
Kabilang sa mga kasong isinampa kina Garin ay reckless imprudence resulting in homicide, paglabag sa batas kontra torture, at consumer act.
Sa sinumpaang reklamo ng ina ni Tablete na si Rowena Villegas na malusog umano ang katawan ng kanyang anak, pero minsan ay nakakaranas ng asthma, subalit lumala ang kondisyon ng baga nito matapos maturukan ng tatlong beses ng Dengvaxia noong Marso 2016 hanggang Hulyo 2017.
Noong Oktubre 30, 2017 ng gabi nang isinugod sa Olongapo Hospital si Tablete matapos makaranas ng hirap sa paghinga at panghihina na kalaunan ay idineklarang dead-on-arrival.
Nagawa pang ma-revive ang biktima, subalit kinaumagahan ay binawian na rin ito ng buhay na iniuugnay ng PAO forensics team na may kauganayan sa Dengvaxia.
- Latest