B-day tragedy: 4 patay
Multicab vs van...
MANILA, Philippines — Napalitan ng trahedya ang masayang birthday party na dinaluhan ng apat katao kabilang ang tatlong mag-ina matapos na sila ay masawi nang sumalpok ang sinasakyan nilang multicab sa isang van kamakalawa ng hapon sa Brgy. Kanyuko, Dumanjug, Cebu.
Hindi na umabot ng buhay sa ospital ang mga biktimang sina Jennifer Lopez, 26, anak nitong sina Harvey Lopez; Oliver; at Mary Ann Quirante, 27.
Patuloy namang nilalapatan ng lunas sa pagamutan ang mga sugatang sina Raymond Alpuerto, 20; Jessa Mae Lopez, 1; Soraida Quirante, 54; Quirnn Alpuerto, 3; Quinne Alpuerto,1; Lyn Quirante, 25; James Lopez, 9 at ang driver ng multicab na si Saulo Quirante, 59.
Batay sa ulat, dakong alas-3:00 ng hapon ay kasalukuyang lulan ng multicab ang mga biktima galing sa pagdalo sa isang kaarawan at papauwi na sa kanilang bahay nang mangyari ang insidente sa highway.
Ang multicab ay nasalpok ng wing van (MFK 633) na minamaneho ni Julito Cuyos.
Sa lakas nang pagkakabangga ay nagpaekis-ekis sa highway ang takbo na ikinasugat at ikinasawi ng mga biktima.
Agad namang sumaklolo ang mga rescuers na isinugod ang mga biktima sa pagamutan para malapatan ng lunas.
Patuloy ang masusing imbestigasyon ng mga otoridad sa kasong ito.
- Latest