44 bus ng Dimple Star pinigil sa Mindoro
MANILA, Philippines — Pinigil ng pulisya ang may 44 bus ng Dimple Star sa Occidental Mindoro at Iloilo City habang bumibiyahe sa pier sa bayan ng Roxas, Oriental Mindoro kamakalawa ng hapon.
Ito’y sa kabila ng kautusan ni Pangulong Rodrigo Duterte na suspendihin na ang prangkisa ng mahigit 100 bus ng Dimple Star at arestuhin ang operator o may-ari nito bunga ng malagim na trahedya ng aksidenteng kinasangkutan ng isa nitong behikulo.
Magugunita na noong Marso 20 ng gabi, 19 katao kabilang ang konduktor at driver ang nasawi habang 21 pa ang nasugatan makaraang aksidenteng sumalpok sa barandilya ng Patrick Bridge at bumulusok sa bangin ang isang bus (TYU 708) ng Dimple Star sa Brgy Batong Buhay, Sablayan, Occidental Mindoro.
Ayon kay MIMAROPA (Mindoro, Marinduque, Romblon, Palawan) Police Spokesperson Supt. Imelda Tolentino, agad na ipinag-utos ni Chief Supt. Emmanuel Luis Licup, regional director ng kanilang himpilan sa Provincial Directors ng Oriental at Occidental Mindoro na harangin at huwag pahintulutang bumiyahe ang mga bus ng Dimple Star.
Sinabi ni Tolentino na nasa 44 bus ng Dimple Star ang naharang ng pulisya bandang alas-4 ng hapon sa Occidental Mindoro at Oriental Mindoro.
- Latest