4 timbog sa P60-M shabu
MANILA, Philippines — Sa kalaboso ang bagsak ng tatlong pinaghihinalaang mga big time drug traffickers matapos silang masakote ng mga elemento ng Philippine Drug Enforcement Agency (PDEA) at PNP-Drug Enforcement Group (PNP-DEG) sa isinagawang buy bust operation sa isang mall sa Ayala Alabang, Muntinlupa City habang arestado naman sa follow-up operation ang Chinese supplier ng mga ito sa Makati City na nagresulta sa pagkakasamsam ng P 60-milyong halaga ng shabu nitong Biyernes.
Nahaharap na sa kasong paglabag sa Republic Act 9165 o Comprehensive Dangerous Drug Act 0f 2002 ang tatlong suspek na kinilalang sina Norodian Gumadel, 28-anyos, may asawa, ng Maguinao Sr. New Lower Bicutan, Taguig City; Lady Jane Flores, 24 taong gulang, dalaga, at naninirahan sa B-25 Lot 33 Green Valley San Nicolas 3 Bacoor Cavite at si Regina Inocencia San Miguel, 40, Phase 6 No.16 Apartment B Cadena de Amor St. Pacita 11, San Pedro, Laguna.
Sa ulat ni Senior Supt. Dionisio Bartolome, hepe ng Muntinlupa City Police, dakong alas-12:00 ng tanghali nang isagawa ang operation sa Parking 5 ng Alabang Town Center sa Ayala Alabang. Ito ay makaraang makatanggap ng tip ang mga tauhan ng PDEA sa magaganap na transaksyon sa iligal na droga.
Isang tauhan ng PDEA ang nagpanggap na poseur buyer para bumili ng droga sa mga suspek sa nasabing parking area na nagresulta sa pagkakadakip sa tatlong suspek.
Nasa limang pakete ng shabu na may timbang na mahigit sa sampung kilo at nagkakahalaga ng P50-milyon ang nakumpiska sa mga suspek.
Sa follow-up operations naman sa lungsod ng Makati ay nasakote ang Chinese supplier ng mga suspek na nakumpiskahan naman ng 2 kilo ng shabu na nagkakahalaga ng P 10 M.
Ang nasabing Chinese na ikinanta ng tatlong drug trafficker ay hirap magsalita ng Ingles at patuloy pang isinasailalim sa masusing tactical interrogation.
- Latest