Kinidnap na guro nakatakas sa Abu Sayyaf
MANILA, Philippines — Isang guro na dinukot ng mga bandidong Abu Sayyaf Group ang nakatakas kamakalawa ng umaga sa kaniyang mga abductors sa kagubatan ng Patikul, Sulu.
Kinilala ni Sr. Inspector Jemar delos Santos, Spokesman ng Autonomous Region in Muslim Mindanao (ARMM) Police ang nakatakas na bihag na si Sitti Doris Hamsirani, 45, biyuda, residente ng Sitio Palar, Gandasuli, Patikul, Sulu.
Magugunita na ang biktima ay nabihag ng mga bandido noong Marso 7 ng taong ito sa bisinidad ng Sitio Bakud Datan, Brgy. Timbangan ng nasabing bayan.
Ayon sa ulat, naispatan ng mga residente ang guro habang hingal na hingal dulot ng matinding pagod habang naglalakad sa kagubatan ng Sitio Putih, Brgy.Liang ng bayang ito dakong alas-9:30 ng umaga kamakalawa.
Nagresponde ang mga operatiba ng pulisya sa ilalim ng superbisyon ni Sr. Supt. Pablo Labra III , Provincial Director ng Sulu Police at ligtas na nasagip ang biktima.
- Latest