Shabu ang taya sa ‘kara-krus’, 2 timbog!
Sugal ng mga adik
MANILA, Philippines — Kalaboso ang dalawa katao kabilang ang isang babae matapos na mahuli ng mga pulis sa akto na naglalaro ng sugal na kara-krus (cara y cruz) at shabu umano ang kanilang pantaya kahapon sa Caloocan City.
Ang mga naarestong suspek ay kinilalang sina Evelyn Nagales, 40, ng #227 BMBA Compound, 4th Avenue, Brgy. 120 at Glen Dupang, 28, ng #197 BMBA 2nd St., 3rd Avenue ng naturang lugar.
Ayon kay Supt. Ferdinand Del Rosario, deputy chief of police for administration ng Caloocan, alas-11:30 ng umaga habang nagsasagawa ng beat patrol ang mga pulis ng Police Community Precint (PCP) 1 sa Brgy. 120, nang i-report sa kanila ng concerned citizen ang lantarang iligal na sugal na “cara y cruz” sa BMBA Compound at shabu umano ang taya ng mga suspek.
Agad na nagresponde sa lugar ang mga pulis at dito nila naaktuhan ang dalawa na naglalaro ng kara-krus at sa halip na pera ay droga ang kanilang taya.
Kasong paglabag sa R.A. 9165 o Comprehensive Dangerous Drug Act of 2002 at City Ordinance 1272 ang isinampang kaso ng pulisya sa mga naarestong suspek.
- Latest