Intsik timbog sa p8-m shabu
MANILA, Philippines - Isang Chinese national na pinaniniwalaang miyembro ng isang bigtime drug syndicate at isa sa mga supplier ng droga sa Metro Manila ang naaresto ng Philippine Drug Enforcement Agency (PDEA) sa isang buy bust operation sa Parañaque City, kamakalawa ng gabi.
Kinilala ni PDEA Regional Director Wilkins Villanueva ang suspect na si Niko Sy “alyas Shi Yong Ming” na pansamantalang naninirahan sa Malate Manila at nakumpiska dito ang nasa 2 kilong shabu na may street value na P8 milyon.
Base sa report ng mga otoridad, bandang alas-10:00 ng gabi nang unang magsagawa ng buy bust operation sa may parking lot ng Harrison Plaza sa Maynila.
Subalit, nakatunog umano ang suspect at binago nito ang lugar at napagkasunduan ang transaksyon sa may Macapagal Boulevard malapit sa Solaire Casino Hotel sa Parañaque City.
Nagpanggap na poseur buyer ang isang tauhan ng PDEA na bibili ng isang isang kilong shabu na nagkakahalaga ng P1 milyon.
Nang aktong iabot na ni Sy ang nasabing droga ay dito na siya inaresto ng mga nakaantabay na miyembro ng PDEA.
Nang halungkatin ang kotse nito ay nakuha pa ang isang kilong shabu at P250,000 cash, na hinihinalang drug money at ang P1 milyon marked money na ginamit sa buy bust operation.
Ayon sa PDEA ang suspect ay sinasabing supplier ng droga na nag-ooperate sa Metro Manila at pansamantalang hindi muna binanggit ang pangalan ng drug syndicate dahil sa isasagawang follow-up operation.
- Latest