Baby Falcons nakatutok sa back-to-back SGVIL crown
MANILA, Philippines — Ang back-to-back titles ang misyon ng Adamson University sa pagsabak sa 2025 Shakey’s Girls Volleyball Invitational League (SGVIL) sa Mayo 28 sa La Salle Green Hills gym.
Ito ay bagama’t umakyat na sa Lady Falcons ang dating kamador ng Baby Falcons na si Shaina Nitura.
“The challenge for us is how to adjust in every situation and every game because we have new players, especially some of them are very young,” ani Adamson head coach JP Yude sa press launch ng third season ng liga sa Shakey’s Malate.
Sa pagkawala ni Nitura, hinirang na SGVIL MVP, ay sasandal ang Baby Falcons kina skipper Abegail Segui, Lhouriz Tuddao at UAAP Season 87 Rookie of the Year Ellaine Gonzalvo sa kampanya sa Pool A ng Division 1 na nagtatampok sa 20 schools mula sa Metro Manila at iba pang rehiyon.
Kasama ng Adamson sa Pool A ang Lyceum of the Philippines University, Naga College Foundation, Emilio Aguinaldo College at University of Perpetual Help sa premier grassroots volleyball tournament na suportado ng Shakey’s Pizza Parlor, Peri-Peri Charcoal Chicken, Potato Corner at R and B Milk Tea.
Nasa Pool B ang 2024 runner-up Bacolod Tay Tung, Bethel Academy, De La Salle-Lipa, Chiang Kai Shek College at Holy Rosary College.
- Latest
