Stage 5 inagaw ni Javiniar
Tour of Luzon: ‘great revival’
CLARK, Philippines — Kumaripas si Joseph Javiniar ng Excellent Noodles Cycling Team sa huling limang kilometro para angkinin ang 166.65 Clark-Clark (via New Clark City) Stage 5 ng 2025 MPTC Tour of Luzon kahapon dito sa Filinvest Mimosa Acacia Drive sa Clark, Pampanga.
Tinawid ng 25-anyos na si Javiniar ang finish line sa tiyempong tatlong oras, 29 minuto at 20 segundo para sa una niyang stage win.
“Last five kilometers kumawala na po ako. Bale pito po kami na nag-breakaway sa Sacobia Bridge (Mabalacat, Pampanga),” sabi ng tubong Pagsanjan, Laguna sa kanyang panalo sa eight-stage race na inihahandog ng DuckWorld PH at Cignal katuwang ang Pilipinas Live, Meralco, Maynilad, Metro Pacific Health, Megaworld, Landco, PLDT at Smart.
Iniwanan ni Javiniar sina Jonel Carcueva ng MPT Drivehub at Marc Ryan Lago ng Go For Gold Cycling Team na parehong may 42 segundo ang agwat.
“Hindi ko ine-expect na mananalo ako. Sobrang hirap ng breakaway from start to finish,” dagdag ni Javiniar na dating waiter sa Pagsanjan bago nagdesisyong maging isang full-time cyclist ng Excellent Noodles team.
Samantala, hindi pa rin mahubad kay Joo Dae Yeong ng Gapyeong Cycling Team ang suot na yellow jersey sa kanyang patuloy na pangunguna sa individual general classification.
Nagtala ang 29-anyos na si Joo ng 14:07:40 kasunod sina Ronald Oranza (-0:04:40) ng Standard Insurance Philippines, Mendoza (-0:04:36) ng Go for Gold, Dominic Perez (-0:04:43) ng Exodus Army Cycling Team at Mervin Corpuz (-0:04:44) ng MPT Drivehub.
- Latest
