Jungkook kampeon sa Chairman’s Cup
MANILA, Philippines — Pinabilib ng Jungkook ang mga liyamadista matapos nitong sikwatin ang panalo sa 2025 PHILRACOM ‘Chairman’s Cup’ noong Linggo ng hapon sa Metro Turf, Malvar - Tanauan City, Batangas.
Pagsalida sa aparato ay ipinuwesto ni class A rider Kelvin Abobo ang Jungkook sa pang-anim upang pagmasdan ang mga naglulutsahan na Diversity, Batang Manda at Worshipful Master.
Patuloy na naging mainitan ang bakbakan ng matutulin sa largahan na Diversity, Batang Manda at Worshipful Master sa unang kurbada habang nasa malayong pang-apat ang Basheirrou at Jungkook.
Kumuha na ng bandera ang reigning Philippine Sportswriters Association, (PSA) - Horse of the Year awardee, Batang Manda pagsapit sa kalagitnaan ng karera at sumunod naman ang Worshipful Master habang nalulusaw sa pangatlo ang Diversity.
Pero nagsimula ng magparemate si Abobo at dahil malakas ang dating ay nakuha na agad ng Jungkook ang unahan papunta pa lang sa huling kurbada.
Mabilis ang paghakbang ng Jungkook, umungos ng dalawang kabayo sa Batang Manda sa rektahan at nagtuluy-tuloy na ang winning horse sa finish line sa tiyempong 2:07 minuto.
- Latest
