Bolts sinilat ng Elasto Painters
MANILA, Philippines — Sinilat ng pilay na Rain or Shine ang reigning champion na Meralco, 128-116, para sa ikalawang sunod na tagumpay nito sa 2025 PBA Philippine Cup kahapon sa Ynares Sports Center sa Antipolo.
Kulang ng 4 na manlalaro ang Elasto Painters dahil sa injuries subalit hindi pa rin matinag nang umalagwa sa second half mula sa dikit na 66-59 abante sa halftime.
Angat sa 2-1 kartada ang RoS matapos ang 113-96 panalo kontra sa NorthPort bago ang PBA break para sa Semana Santa na pambawi nila sa sablay na unang salang kontra sa NLEX, 109-95.
Humakot ng 27 puntos, 7 rebounds, 2 assists at 3 tapal si Santi Santillan upang pamunuan ang kalat na opensa ng Elasto Painters na semifinalist ng nakaraang Governors’s Cup at Commissioner’s Cup kaya determinadong makabawi ngayong All-Filipino tourney.
Nag-ambag ng tig-24 puntos sina Gian Mamuyac at Adrian Nocum habang may 13 , 12 at 10 puntos sina Felix Pangilinan-Lemetti, Gabe Norwood at Jhonard Clarito, ayon sa pagkakasunod.
Hindi ininda ng mga bataan ni coach Yeng Guiao ang kawalan nina Beau Belga, Keith Datu, Caelan Tiongson at Shaun Ildefonso dahil sa magkakaibang injuries.
Nagawa ito ng RoS sa likod ng 36-23 ratsada sa third quarter upang makalayo sa palabang Meralco hanggang sa lumamang pa ng hanggang 20 puntos tungo sa tagumpay.
Nalasap ng Bolts ang ikatlong sunod nilang kabiguan para sa biglaang 2-3 kartada matapos ang mainit na 2-0 simula.
- Latest
