Nakhon Ratchasima umeskapo sa PLDT

MANILA, Philippines — Naitakas ng Nakhon Ratchasima QminC ng Thailand ang 26-24, 25-20, 20-25, 20-25, 15-9 panalo kontra sa PLDT upang upang masikwat ang No. 1 seed sa Pool D ng 2025 AVC Women’s Champions League kahapon sa PhilSports Arena sa Pasig City.

Muntikang malustay ng Nakhon ang 2-0 set lead at 5-2 na bentahe sa fifth set bago patunayan ang kalibre nito bilang 6-time champion ng Thailand.

Nagpakawala ng 7-0 ratsada ang Nakhon upang blangkahin ang PLDT sa huling sultada matapos nitong maagaw ang manibela sa 9-8 tungo sa dikdikang tagumpay.

Humataw ng 18 at 16 puntos sina Anyse Marlee Smith at Evangelia Chantava para bumida sa Nakhon na nakakuha rin ng suporta mula kay Onuma Sittirak na may 9 puntos.

Nagtapos sa 2-0 kartada ang Nakhon para sa pri­mera pwesto ng Pool D at naitakda ang quarterfinal duel kontra sa PVL bet na Creamline na sumegunda sa Pool A bitbit ang 1-1 kartada.

Nauna nang nakaiskor ng 25-10, 25-16, 25-12 panalo ang Nakhon kontra sa Queensland Pirates ng Australia, na dinaig din ng PLDT, 25-19, 25-12, 25-12, upang makasampa pa rin sa quarterfinals.

May 1-1 marka ang High Speed Hitters para sa No. 2 seed ng Pool D at makakatapat naman ang Pool A leader na Zhetysu ng Kazakhstan.