Petro Gazz kakapit sa solo second spot

MANILA, Philippines — Ang pang-walong sunod na ratsada ang hangad ng Petro Gazz sa pagharap sa Galeries Tower sa 2024-25 Pre­mier Volley­ball League (PVL) All-Filipino Confe­rence.

Lalabanan ng Gazz An­gels ang Highrisers nga­yong alas-4 ng hapon ka­sunod ang bakbakan ng nagdedepensang Creamline Cool Smashers at PLDT High Speed Hitters sa alas-6:30 ng gabi sa Ynares Center sa Antipolo City.

Bumabandera ang Creamline sa bitbit na 9-0 re­cord kasunod ang Petro Gazz (8-1), Cignal HD (7-3), Choco Mucho (7-3), PLDT (6-3), Akari (5-5), Chery Tiggo (5-5), ZUS Cof­fee (4-6), Farm Fresh (4-6), Galeries Tower (1-8), Nxled (1-9) at Capital1 Solar Energy (1-9).

Ang pag-uusap sa loob ng court ang isa sa mga na­ging susi sa pitong sunod na pananalasa ng Gazz Angels, ayon kay setter Dja­nel Cheng.

“Siguro mas open com­munication na kami nga­yon. Kapag may naki­ta kaming agad na problem, pag-uusapan agad ‘yun. Hindi puwedeng ipag­pabukas,”ani Cheng matapos ang 25-19, 25-18, 25-9 pagdaig sa Solar Spikers.

Bukod kay Cheng, mu­li ring aasahan ng Petro Gazz sina Fil-Am Brooke Van Sickle, Myla Pablo, Jonah Sabete, MJ Phillips at Remy Palma.

Itatapat ng Galeries To­wer sina Jho Maraguinot, Grazie Bombita, Rose Ba­liton, Ysa Jimenez, Dim­dim Pacres at Andrea Mar­zan.

Bagsak ang Highrisers sa apat na dikit na kamalasan, ang huli ay laban sa Cha­meleons, 20-25, 25-19, 14-25, 23-25.

Samantala, puntirya ng Cool Smashers ang pang-10 dikit na panalo sa pagharap sa High Speed Hitters.

Sa tournament format, lalabanan ng top teams ang mga lower ranked squads sa knockout round.

Ang anim na mananalo ang swak sa quarterfinals, habang ang dalawang silya ay paglalabanan ng mga matatalo sa isang play-in tournament.