Rosario ‘di lalaro sa Doha

MANILA, Philippines — Nanganganib na hindi makapaglaro si Troy Ro­sario sa 2nd Internatio­nal Friendly Basketball Championship sa Doha, Qatar na gaganapin sa Peb­rero 14 hanggang 16.

Kamakailan lamang ay idinagdag si Rosario sa Gilas Pilipinas pool para punan ang mga bakanteng posisyon.

Ngunit posibleng hin­di ito makalaro matapos magtamo ng injury sa tu­hod sa laban ng Barangay Ginebra at Meralco sa quarterfinals ng PBA Commissioner’s Cup.

Ayon kay Gilas Pilipinas head coach Tim Cone na siya ring head coach ng Barangay Ginebra, inoobserbahan pa ang lagay ng tuhod ni Rosario.

Namaga ang tuhod ni Rosario matapos itong ma­tamaan sa Game 1 at Game 2 ng quarterfinal series ng Gin Kings at Bolts.

Nakapaglaro pa ito sa Game 3 kung saan nagtala si Rosario ng 12 points sa 94-87 panalo ng Gin Kings kontra sa Bolts no­ong Linggo na nagdala sa ka­nila sa semifinals.

Posibleng magpahinga si Rosario ng lima hanggang pitong araw para tu­­luyang gumaling ang tu­­hod nito.

Nakatakdang sumalang sa ensayo ang Gilas Pilipinas sa Ins­pire Sports Academy sa Calamba, La­guna bago tumulak sa Do­ha para sa friendly tournament.

Matapos ang Doha event ay babalik ang Gilas Pilipinas sa Maynila bago tumulak naman patungong Taipei, Taiwan para sa laban nito kontra sa Chinese-Taipei sa Pebrero 20.

Sunod na makakalaban ng Gilas Pilipinas ang New Zealand sa Pebrero 23 sa Auckland, New Zealand.

Malaking tulong pa naman sana si Rosario la­lo pa’t nawala sa lineup si Kai Sotto na sumailalim sa operasyon dahil sa ACL injury at kasalukuyang nag­papagaling.