Andiamo A Firenze wagi sa Japan Cup

MANILA, Philippines — Walang kahirap-hirap na sinikwat ng Andiamo A Fi­renze ang korona sa naganap na 2025 Japan Cup race na inilarga sa Metro Turf, Malvar sa Tanauan City, Batangas noong Linggo ng hapon.

Humarurot agad sa largahan ang Andiamo A Firenze upang sunggaban ang unahan, habang pilit na kumakapit ang kanyang mga tigasing katunggali.

Sa kaagahan ng karera ay nasa isa’t kalahating kaba­yo ang agwat ng Andiamo A Firenze sa Daily Burn, pero pagdating sa kalagitnaan ng labanan ay umungos pa ito ng hanggang tatlong kabayo.

Halos hindi nakitaan ng pagkahingal ang Andiamo A Firenze pagsapit ng bakbakan sa far turn dahil umabot na sa four lengths ang lamang kaya sa rektahan ay halos wala nang gustong humabol sa winning horse.

Tinawid ng Andiamo A Firenze ang finish line na may anim na kabayo ang lamang sa pumangalawang Madam Mayhem, pangatlo ang Midnight Cat at pang-apat ang Mano Dura.

Inilista ng Andiamo A Firenze ang tiyempong 1:37 minuto sa 1,600 meter race sapat upang hamigin ni winning horse owner Joseph Dyhengco ang P600.000.

Pitong karera ang pinakawalan ng Metro Manila Turf Club Inc. (MMTCI).