Ratsada sa Hangzhou?
Muling sumigla at lumakas ang “women power” ng Philippine sports.
Pinahupa ni Alex Eala ang kanyang sadsad at hinugot ang ikatlong ITF championship nang ikumpleto ang title run sa Yecla, Spain noong nakaraang araw.
Kasabay nito sa New Jersey sa United States ay kumana ng Top 10 finish si Fil-Japanese golfer Yuka Saso sa Mizuho Americas Open at nagbulsa ng $70,463 cash prize.
Parehong matagal nanamlay ang laro ng dalawa bago muling uminit at umukit ng magandang showing.
Sana magpatuloy ang ratsada ng dalawa, lalo na si Eala patungo sa kanyang kampanya sa Hangzhou Asian Games sa Setyembre.
Mabigat ang laban dahil world power na rin ang mga pambatong tennis players ng Japan, China at South Korea.
Pero puwedeng pangarapin ang podium finish.
At nariyan din ang mga panlaban nating women weightlifters.
Sasabak ang Team Phl sa Hangzhou Asiad galing sa four-gold showing sa nakaraang Asiad sa Palembang at Jakarta kung saan pawang babae ang nag-deliver ng panalo — Saso sa golf, Hidilyn Diaz sa weightlifting at Margielyn Didal sa skateboarding.
Siguradong mas malakas ang Team Phl ngayon kung sasalang din sa laban sina world champion gymnast Caloy Yulo at World No. 3 pole vaulter EJ Obiena.
- Latest
