Celtics dumikit na sa Heat!
BOSTON — Kumana si Derrick White ng 24 points, tampok ang anim na three-pointers, at dinomina ng Celtics ang Miami Heat, 110-97, sa Game Five para sa 2-3 agwat sa kanilang Eastern Conference finals series.
Umiskor si Marcus Smart ng 23 points bukod sa limang steals habang may tig-21 markers sina Jayson Tatum at Jaylen Brown para sa ikalawang sunod na ratsada ng Boston sa serye.
Hawak ang 3-2 bentahe, may tsansa pa rin ang Miami na umabante sa NBA Finals kung mananalo sa Game Six bukas sa kanilang balwarte.
Wala pang koponan sa NBA history na nakabalik mula sa 0-3 deficit para ipanalo ang anumang serye.
Nagsalpak ang Celtics ng kabuuang 16 triples para muling pigilan ang Heat.
“Tonight we were the tougher playing team,” sabi ni Brown sa Boston. “We set the tone from start to finish.”
Pinamunuan ni Duncan Robinson ang Miami sa kanyang 18 points habang may 16 at tig-14 markers sina Bam Adebayo, Jimmy Butler at Caleb Martin, ayon sa pagkakasunod.
Ang matinding depensa ang Celtics ang pumuwersa sa Heat sa 16 turnovers.
Nagtayo ang Boston ng 20-point lead sa first half hanggang ibaon ang Miami sa 96-72 sa fourth quarter.
Nakaapekto rin sa opensa ng Heat ang hindi paglalaro ni point guard Gabe Vincent na nagkaroon ng sprained left ankle sa Game Four.
- Latest