1st-round sweep puntirya ng La Salle
MANILA, Philippines — Susubukan ng De La Salle University na makumpleto ang first-round sweep sa pagharap nito sa defending champion National University sa pagpapatuloy ng UAAP Season 85 women’s volleyball tournament ngayong araw sa Mall of Asia Arena sa Pasay City.
Makakasagupa ng Lady Spikers ang Lady Bulldogs sa alas-2 ng hapon habang magtutuos ang Adamson University at University of the Philippines sa alas-12 ng tanghali.
Itataya ng La Salle ang malinis na 6-0 rekord nito kung saan pakay ng tropa na makabawi sa NU na tumalo sa kanila sa finals ng nakalipas na season.
Ngunit iba na ang Lady Spikers ngayon dahil nariyan na si super rookie Angel Canino na pangunahing inaasahan ng Taft-based squad.
Makakatuwang ni Canino sa opensa sina Jolina Dela Cruz, Thea Gagate, Baby Jyne Soreno at Fifi Sharma na umiskor ng anim na blocks sa kanilang huling laro.
“What I’ve been telling them is that if we can get our points on the service and blocking departments, why wouldn’t we? And why would we make it hard for our spikers? We should banked on our strength which is blocking,” ani La Salle interim coach Noel Orcullo.
Galing ang La Salle sa 22-25, 25-14, 25-16, 25-19 panalo sa Adamson noong Linggo para mapanatilong malinis ang kanilang rekord.
“We should live up to the billing that we are the number one team in terms of blocking. We are the number one team in blocking so we need to work on our job above (on the net),” ani Orcullo.
Tiwala naman si Canino na makapagbibigay ng magandang laban ang kanilang tropa sa pagkakataong ito kumpara sa nakaraang season.
Desidido naman ang Lady Bulldogs na madungisan ang rekord ng Lady Spikers.
Sariwa pa ang NU sa 25-21, 25-9, 25-18 demolisyon sa FEU sa kanilang huling laro.
- Latest
