‘Iron Man’ may pinagdaraanan
MANILA, Philippines — Isang pambihirang laban ang nakatakdang harapin ngayon ni “Iron Man” LA Tenorio.
Sa isang emosyonal na pahayag kahapon, mismong si Tenorio ang nagpahayag na umiinda siya ng Stage 3 colon cancer na dahilan ng kanyang hindi paglalaro sa nakalipas na buwan para sa Barangay Ginebra sa 2023 PBA Governors’ Cup.
“I was recently diagnosed with Stage 3 colon cancer,” pag-amin ni Tenorio na umani ng suporta at panalangin mula sa mga kapwa players, coaches, teammates at fans sa pinakamalaking laban na kanyang sasagupain.
“The initial testing three weeks ago led me to instantly miss practices and games. I have completed my surgery last week and will soon undergo treatment for the next few months.”
Sa simula nitong buwan ay nauna nang lumiban si Tenorio dahil sa aniya’y aggravated sports hernia injury.
Dahil dito ay nag-wakas ang kanyang makasaysayang streak ng paglalaro sa PBA sa 744 na sunod na games sa loob ng 17 taon.
Ang pambihirang streak ni Tenorio, sa likod ng maayos na pangangalaga sa katawan, ang dahilan kaya nabansagan siyang Iron Man simula nang pumasok sa PBA noong 2006 bilang No. 4 overall pick ng San Miguel bago mapunta sa Alaska at sa Ginebra.
Subalit hindi nagkukulang sa pananampalataya at pag-asa ang 38-anyos na guwardiya na tulad ng kanyang mga daan-daang laban ay kaya niya rin maipanalo ang pinakamahirap na duwelong ito.
- Latest
