SEAG swim tryouts lalarga sa Capas

MANILA, Philippines — Magpapasiklaban ang matitikas na tankers sa bansa sa qualifying event na naglalayong makabuo ng solidong koponan para sa 32nd Southeast Asian Games na idaraos sa Mayo sa Cambodia.

Aarangkada ang qua­lifiers mula Pebrero 16 hanggang 19 sa New Clark City Aquatics Center sa Capas, Tarlac.

Sinabi ni Stabilization Committee member Bones Floro na mga certified technical officials ang magpapatakbo ng trials.

May 34 swimming events para sa men at women ang itatanghal.

“We sought the help of the continental body, the Asian Swimming Federation, for these trials,” ani Floro na deputy secretary general for international affairs ng Philippine Olympic Committee (POC).

May hanggang Pebrero 14 lamang maaaring magsumite ng entry.

“The information kit and selection criteria were released at the start of the week and we are impressed that we received quite a number of inquiries and intent to participate from our athletes, clubs and coaches,” dagdag ni Floro.

Kasama ni Floro sa Stabilization Committee sina Philippine Olympic Committee legal head Atty. Wharton Chan at Bases Conversion and Development Authority Senior Vice President for Corporate Services Group Arrey Perez.

Bukod sa swimming, pipili rin ang Stabilization Committee ng mga isasabak sa men at women water polo at sa individual 3-meter springboard at platform sa diving.

Sa swimming events, paglalabanan ang slots sa 50, 100, 200, 800 at 1,500 meters sa freestyle; 50, 100 at 200 meters sa  butterfly, backstroke at breaststroke; at 200 at 400 individual medley.

Sa oras na mabuo na ang national team, sasailalim ito sa four-week trai­ning program na babantayan ng Stabilization Committee.