June Mar, Scottie bandera sa botohan sa PBA All-Star
MANILA, Philippines — Abante sa karera ng PBA All-Star voting sina dating MVP June Mar Fajardo ng San Miguel Beer at reigning MVP Scottie Thompson ng Barangay Ginebra sa unang bahagi ng botohan para sa All-Star Weekend sa Passi City, Iloilo.
Numero uno ang six-time MVP na si Fajardo na may 37,915 votes kasunod si Thompson na may 37,759 votes.
Sina Fajardo at Thompson din ang tinanghal na Best Player of the Conference sa Season 47 na Philippine Cup at Commissioner’s Cup, ayon sa pagkakasunod.
Kung magtutuluy-tuloy ay sina Fajardo at Thompson ang magiging kapitan ng dalawang teams para sa pagbabalik ng All-Star Game sa Marso 9-12 sa Iloilo matapos ang tatlong taong pagkakatengga dahil sa pandemya.
Pipili sila ng kanilang mga magiging teammates sa pamamagitan ng drafting sa natitirang 22 players na papasok sa Top 24 pagkatapos ng botohan.
Halos kagaya ito ng format ng NBA All-Star game at ang kaibahan lang ay mga fans ang pipili ng lahat ng 24 players na sasalang sa PBA All-Star.
Tanging starters lang ang puwedeng iboto ng mga fans sa NBA at coaches na ang pipili ng reserves bagama’t dadaan din ito sa drafting ng dalawang kapitan na sa ngayon ay sina Lebron James ng Los Angeles Lakers at Giannis Antetokounmpo ng Milwaukee Bucks.
Sumunod kina Fajardo at Thompson sina Japeth Aguilar (37,322) at Jamie Malonzo (32,998) ng Ginebra kasama si Calvin Abueva (32,503) ng Magnolia para kumpletuhin ang Top 5.
Swak naman sa Top 10 sina CJ Perez (31,184) ng SMB, Christian Standhardinger (29,821) ng Ginebra at James Yap (28,117) ng Rain or Shine pati na sina Gin Kings LA Tenorio (28,027) at Stanley Pringle (27,441).
- Latest