Davis bumida sa panalo ng Lakers
LOS ANGELES — Solido ang pagbabalik ni Anthony Davis sa aksyon matapos tumipa ng 21 points at 12 rebounds, habang nag-ambag ang bagong hugot na si Rui Hachimura ng 12 markers sa kanyang Lakers debut para talunin ang San Antonio Spurs, 113-104.
Magkasabay na pumasok sina Davis, nanggaling sa right foot injury, at Hachimura sa huling 4:22 minuto ng first quarter.
Hindi nakita sa Davis sa 20 laro ng Lakers (23-26), habang nahugot naman si Hachimura mula sa Washington Wizards sa pamamagitan ng trade.
Tumapos si LeBron James na may 20 points, season-high na 11 assists at 9 rebounds.
Pinamunuan ni Keldon Johnson ang Spurs (14-34) sa kanyang hinakot na 25 points.
Matapos kunin ng San Antonio ang 85-81 abante ay isang 22-6 atake ang ginawa ng Los Angeles sa pagsisimula ng fourth quarter para kontrolin ang laro.
Sa San Francisco, isinalpak ni Jordan Poole ang kanyang winning layup sa 122-120 pagtakas ng nagdedepensang Golden State Warriors (24-24) sa Memphis Grizzlies (31-17).
Sa Portland, nagpasabog si Damian Lillard ng season-high na 60 points sa 134-124 panalo ng Trail Blazers (23-25) sa Utah Jazz (25-26).
Sa Milwaukee, humakot si Giannis Antetokounmpo ng 33 points at 14 rebounds sa 107-99 pagsuwag ng Bucks (31-17) sa Denver Nuggets (34-15).
Sa Oklahoma City, tumipa si Trae Young ng 33 points at 11 assists sa 137-132 pagdagit ng Atlanta Hawks (25-24) sa Thunder (23-25).
Sa Philadelphia, umiskor si Tyrese Maxey ng 27 points sa 137-133 pagdaig ng 76ers (31-16) sa Brooklyn Nets (29-18).
Sa Houston, humataw si Kyle Kuzma ng 33 points sa 108-103 pagsapaw ng Washington Wizards (22-26) sa Rockets (11-37).
- Latest
