NLEX buwenamano ang Blackwater

MANILA, Philippines — Tatlong oras bago labanan ng NLEX ang Blackwater ay nakakuha si import Jonathan Simmons ng FIBA clearance mula sa kanyang mother ballclub na Shanxi Loongs para makapaglaro sa PBA.

At ang resulta nito ay ang pagkolekta ng NBA veteran ng 32 points, 9 rebounds, 7 assists at 2 steals sa 124-102 pagdomina ng Road Warriors sa Bossing sa 2023 PBA Governors’ Cup kahapon sa Smart Araneta Coliseum.

Ayon kay coach Fran­kie Lim, hindi niya inisip ang problema nila sa pag­lalaro ni Simmons.

“Last night I slept early. I didn’t want to think about it,” wika ni Lim sa sitwasyon ng four-year NBA guard na naglaro para sa San Antonio Spurs, Orlando Magic at Philadelphia 76ers. “But I was confident that he can play.”

Humataw naman si Kevin Alas ng 19 sa kanyang 31 points sa fourth quarter.

Umiskor si balik-import Shawn Glover ng 26 points, 7 assists at 5 rebounds para pamunuan ang Blackwater.

Dinikitan ng Bossing ang Road Warriors mula sa halftime, 56-58, hanggang sa third period, 81-84, bago nakahulagpos ang PLDT franchise sa 98-91 sa 7:22 minuto ng fourth quarter.

Huling naghamon ang Blackwater sa 93-98 ga­ling sa basket ni Glover sa 6:56 minuto ng laro hanggang kumawala ang NLEX sa likod nina Simmons at Alas para ilista ang 20-point lead, 122-102, sa huling minuto.

Sa ikalawang laro, naglista si import Jalen Hudson ng 34 points, 10 rebounds at 7 assists para sa 123-119 pagpapatumba ng TNT Tropang Giga sa Phoenix sa coaching debut ni Jojo Lastimosa.