Hotshots, Dragons diretso sa semis
MANILA, Philippines — Kumawala ang No. 2 Magnolia sa huling limang minuto ng laro para sibakin ang No. 7 Phoenix, 102-95, sa quarterfinals ng 2022 PBA Commissioner’s Cup kahapon sa Philsports Arena sa Pasig City.
Humataw si Calvin Abueva ng 19 points at nagtala si import Nick Rakocevic ng 18 markers at 13 rebounds para sa pag-usad ng Hotshots sa semifinals.
Tumipa si Tyler Tio ng 18 points para sa Fuel Masters na may ‘twice-to-beat’ disadvantage sa quarterfinals.
Matapos makatabla ang Phoenix sa 86-86 ay humataw ang Magnolia para kunin ang 98-90 abante sa huling 1:38 minuto ng fourth period.
Lalabanan ng Hotshots sa best-of-five semis series ang magwawagi sa pagitan ng Ginebra Gin Kings at NorthPort Batang Pier.
Sa unang laro, humataw si Hayden Blankley ng career-high na 47 points, habang may 32 markers si import Andrew Nicholson sa 126-96 pagpapatalsik ng No. 1 Bay Area sa No. 8 Rain or Shine.
“I’m just so excited that we’re in the top four of the PBA in our first year,” ani mentor Brian Goorjian sa Dragons na may ‘twice-to-beat’ advantage sa quarterfinals.
Haharapin ng Bay Area sa semis ang mananalo sa bakbakan ng San Miguel at Converge.
- Latest