Sulaiman bumuo ng panel ukol sa kuwento ni Padilla

MANILA, Philippines — Hihintayin ni World Bo­xing Council (WBC) president Mauricio Sulaiman ang resulta ng imbestigasyon ng binuo niyang special panel bago maglabas ng komento ukol sa pag-amin ni retired referee Carlos Padilla na tinulungan niyang manalo si Manny Pacquiao kay Australian Nedal Hussein noong taong 2000.

“The WBC will not make any further public comments,” sabi kahapon ni Sulaiman na personal na susundan ang prosesong gagawin ng nasabing panel.

Kamakailan ay inamin ng 88-anyos na si Padilla sa isang interview ng WBC YouTube channel na ginabayan niya ang dating papasikat pa lamang na si Pacquiao para makalusot kay Hussein.

Ayon sa Filipino referee, binigyan niya si Pacquiao ng isang mahabang mandatory 10-count para makabawi mula sa nalasap na knockdown punch ni Hussein sa fourth round ng kanilang WBC International bantamweight title fight noong October 2000 sa Ynares Center sa Antipolo City.

“Pinaburan lang tayo. Pabor lang siguro siyempre home court. As a boxer ginawa ko lang naman iyong tama,” wika ng retirado nang si Pacquiao.

Itinuring din ng ama ni singer/actress Zsa Zsa Padilla na isang legal blow ang sinasabing pag-headbutt ni Pacquiao sa kaliwang mata ni Hussein.

Sa 10th round ay inihinto ng duktor ang laban dahil sa paglaki ng sugat ng Aussie fighter na nagresulta sa panalo ng Pinoy world eight-division champion.

Samantala, sinulatan ni Suzy Padilla-Tuano si Sulaiman para ipaliwanag ang mga nasabi ng kanyang ama sa nasabing interview.

“Communication can be misconstrued and well intentioned words can be misinterpreted,” sabi ng anak ng Hall of Famer. “The present situation is one such glaring example of what might have actually been said (no pun intended), and what may have been taken out of context.”

Kabilang sa mga malala­king laban na hinawakan ni Padilla ay ang mga title fights nina legends Muhammad Ali, Marvin Hagler, Sugar Ray Leonard, Tommy Hearns at iba pa.