Ateneo inagaw ang top spot
MANILA, Philippines — Nakamit ng Ateneo De Manila University at ng De La Salle University ang kanilang tinatarget.
Inangkin ng Blue Eales ang No. 1 seat sa Final Four matapos gibain ang Adamson Soaring Falcons, 66-61 habang tinalo ng Green Archers ang talsik nang UST Growling Tigers, 77-72, sa UAAP Season 85 men’s basketball tournament kahapon sa Smart Araneta Coliseum.
Dahil sa win-over-the-other rule ay naagaw ng Ateneo ang top seeding sa semifinals laban sa nagdedepensang University of the Philippines sa magkatulad nilang 11-3 record.
Binigo ng Katipunan-based team ang Diliman-based squad, 75-67, noong Sabado.
Bilang No. 1 at No. 2 teams ay magkakaroon ang Blue Eagles at Fighting Maroons ng ‘twice-to-beat’ advantage sa No. 4 at No. 3, ayon sa pagkakasunod, sa Final Four.
Lalabanan ng UP ang No. 3 NU (9-5), habang sasagupain ng Ateneo ang mananalo sa playoff ng La Salle at Adamson para sa No. 4 spot.
Matapos ang basket ni Kouame para sa 64-61 abante ng Ateneo sa natitirang 35.3 segundo ay mintis ang tatlong 3-point attempts ng Adamson.
Sinelyuhan ni BJ Andrade ang panalo ng Ateneo mula sa kanyang dalawang free throws.
- Latest