Green Archers, Falcons agawan sa No. 4 seat
MANILA, Philippines — Okupado na ng nagdedepensang University of the Philippines, Ateneo De Manila University at National University ang tatlong silya sa Final Four.
Ang huling semifinals seat ay paglalabanan ng De La Salle University at Adamson University.
Parehong may 6-6 kartada ang Green Archers at Soaring Falcons at kung sino ang makakawalis sa huli nilang dalawang laro sa UAAP Season 85 men’s basketball tournament ang magbubulsa sa No. 4 ticket.
Tangan ng UP ang 11-2 record kasunod ang Ateneo (9-3), NU (9-4), La Salle (6-6), Adamson (6-6), University of the East (4-9), Far Eastern University (4-9) at University of Santo Tomas (1-11).
Haharapin ng Green Archers ang sibak nang Red Warriors ngayong alas-3 ng hapon at makakatapat ng Soaring Falcons ang Bulldogs sa alas-11 ng umaga sa Smart Araneta Coliseum.
Magduduwelo naman sa ala-1 ng hapon ang mga talsik nang Tamaraws at Growling Tigers at magtutuos ang Fighting Maroons at Blue Eagles sa alas-6:30 ng gabi.
Sumasakay ang La Salle sa three-game winning streak tampok ang 63-58 panalo sa NU noong Miyerkules.
Bumida sa nasabing tagumpay ng Taft-based team si guard Penny Estacio na iniskor ang lahat niyang 13 points sa third period.
Matapos ang Bulldogs ay haharapin ng Green Archers ang Growling Tigers sa Miyerkules kung saan lalabanan ng Soaring Falcons ang Blue Eagles.
Kung magtatapos sa magkatulad na marka ang La Salle at Adamson ay maglalaban sila sa isang playoff game para sa No. 4 berth.
- Latest