Lyceum sasalo sa liderato
MANILA, Philippines — Sisikapin ng Lyceum of the Philippines University na muling makisalo sa liderato sa pagharap nito sa mapanganib na Jose Rizal University sa pagpapatuloy ng NCAA Season 98 men’s basketball tournament ngayong araw sa The Arena sa San Juan City.
Magkukrus ang landas ng Pirates at Heavy Bombers sa alas-3 ng hapon matapos ang duwelo ng San Beda University at Arellano University sa alas-12 ng tanghali.
Nasa ikalawang puwesto ang Lyceum bitbit ang 5-1 baraha sa ilalim ng nangungunang College of Saint Benilde na may 6-1 kartada.
Mataas ang moral ng Pirates matapos nitong gulantangin ang reigning champion Colegio de San Juan de Letran noong Linggo sa bendisyon ng 82-75 panalo.
Bumida sa naturang panalo si Mclaude Guadana na nagsumite ng 20 puntos, dalawang boards at dalawang dimes habang naglista naman sina John Barba at Patrick Montano ng tig-12 puntos.
“And of course, following the system and trusting each other. So that’s the number one kaya din kami nanalo,” ani Lyceum head coach Gilbert Malabanan.
Ngunit haharap ang Pirates sa Heavy Bombers na nakasakay din sa four-game winning streak para okupahan ang No. 3 spot kasama ang Red Lions na may katulad na 4-2 rekord.
Sariwa pa ang Jose Rizal sa 83-80 pananaig sa San Beda noong Martes para maikonekta ang ikaapat na sunod na panalo matapos ang dalawang sunod na kabiguan sa pagsisimula ng torneo.
- Latest
