OKC Thunder isusunod ni Sotto at ng 36ers
MANILA, Philippines — Handa na ang Adelaide 36ers na manggulat at umukit ng isa pang kasaysayan sa nakalinyang ikalawang preseason game kontra sa Oklahoma City Thunder bukas matapos ang panalo sa Phoenix Suns.
Ito ang ipinangako ni Craig Randall na siyang bumandera sa 134-124 panalo ng Adelaide sa Phoenix na pinag-usapan sa buong mundo.
“It’s a great feeling, but we’ve got a game tomorrow and we’re going to try and take care of business there too,” ani Randall na kumamada ng siyam na triples patungo sa game-high na 35 points kontra sa Suns.
Sa pangunguna nina Randall at Robert Franks na may 32 points, umiskor ng higanteng upset ang 36ers kontra sa Suns nina Chris Paul, Devin Booker at Deandre Ayton.
Ang 36ers ng Australia ang naging unang overseas team na nakatalo sa isang NBA team sa kahit sa anong preseason game simula noong 2015 nang talunin ng Fenerbahce ng Turkey ang Brooklyn Nets, 101-96.
Sa naturang laro ay nag-ambag rin si Pinoy giant Kai Sotto ng 11 points, 2 rebounds, 2 assists at 1 steal.
“This is just the beginning,” pagbabanta ng 7-foot-3 Filipino tower.
Sasalang ang 36ers laban sa Thunder na pagbibidahan ng dati nilang player na si Josh Giddey, ang No. 6 overall pick ng Oklahoma City noong 2021 NBA Rookie Draft.
Bahagi ang NBL X NBA Tour ng preparasyon ng Adelaide para sa 2022-2023 NBL regular season.
Sa Oktubre 13 lalabanan ng 36ers ang Tasmania JackJumpers.
- Latest