Kai nagpakitang-gilas sa 36ers vs Suns
MANILA, Philippines — Ipinasilip ni Kai Sotto ang kanyang potensyal sa pagbabalik niya sa Amerika matapos tulungan ang Adelaide 36ers na makasungkit ng 134-124 panalo kontra sa Phoenix Suns sa NBL x NBA Tour sa Footprint Center sa Arizona.
Undrafted si Sotto sa 2022 NBA Rookie Draft subalit nagpakitang-gilas kontra sa Suns sa paghakot ng 11 points, 2 rebounds, 2 steals at 1 assist sahog pa ang dalawang dakdak sa loob ng 18 minutong aksyon.
Malaking ambag ito ni Sotto para sa balanseng atake ng Adelaide sa pamumuno nina Craig Randall at Robert Franks na may 35 at 32 points, ayon sa pagkakasunod.
Nagtulong sina Randall at Franks sa 15 tres mula sa kabuuang 24 triples ng Adelaide kumpara sa siyam ng Phoenix.
Ang Adelaide ang unang overseas team na nakatalo sa pambatong NBA ball club simula noong 2015 nang daigin ng Fenerbahce ng Turkey ang Brooklyn Nets, 101-96.
Bumida sa Suns, nanguna sa 2021-2022 NBA regular season sa 64-18 kartada, si Cameron Payne na may 23 markers.
May tig-22 points sina DeAndre Ayton at Mikal Bridges subalit nagkasya lang sina NBA All-Stars Devin Booker at Chris Paul sa 13 at 6 points, ayon sa pagkakasunod.
Sunod na makakaharap ng 36ers ang Oklahoma City Thunder sa Huwebes sa Paycom Center tampok ang dating player nitong si Josh Giddey na napili ng OKC bilang 6th overall pick noong 2021 NBA Rookie Draft.
Bahagi ang NBA Tour ng final build-up ng Adelaide para sa NBL regular season na sumiklab noong Sabado.
Kagagaling lang ng Adelaide sa paghahari sa NBL Blitz preseason games bago ang NBA Tour para sa misyong makabawi matapos kapusin sa playoffs noong nakaraang season sa 7th place finish.
- Latest
