Knights naipuwersa ang three-way tie sa No. 1
MANILA, Philippines — Pinatumba ng reigning champion Colegio de San Juan de Letran ang Mapua University, 67-62, para maipuwersa ang three-way tie sa liderato ng NCAA Season 98 men’s basketball sa The Arena kahapon sa San Juan City.
Humataw ng husto si veteran cager Fran Yu na umiskor ng 15 puntos, limang assists, apat na rebounds at tatlong steals para pamunuan ang Knights sa ikatlong panalo.
Nagdagdag naman si Pailo Javillonar ng 14 markers, tatlong rebounds at isang steal habang gumawa si King Caralipio ng walong puntos, 11 boards, at isang assist.
Ang panalo ang nagdala sa Letran sa 3-1 baraha upang samahan sa tuktok ng standings ang Lyceum of the Philippines University at College of Saint Benilde.
Nagsumite naman sina Kurt Reyson at Kobe Monje ng pinagsamang 15 puntos para sa Knights.
Naipanalo ng Letran ang laro sa kabila ng 22 turnovers nito.
“I’m happy with the players, especially the veterans who stepped up in the fourth quarter. The composure was there,” ani Letran head coach Bonie Tan.
Bagsak ang Cardinals sa 1-4 rekord.
Samantala, magpapatuloy ang aksyon ngayong araw kung saan target ng Lyceum of the Philippines University at College of Saint Benilde na mapatatag ang kapit sa liderato sa pagharap sa magkaibang karibal.
Haharapin ng Lyceum ang University of Perpetual System Dalta sa alas-12 ng tanghali habang aariba naman ang Benilde kontra sa Arellano University sa alas-3 ng hapon.
- Latest
