Knights sososyo sa liderato
MANILA, Philippines — Puntirya ng defending champion Colegio de San Juan de Letran na makisalo sa liderato sa pagharap nito kontra Mapua University sa pagbabalik-aksyon ng National Collegiate Athletic Association (NCAA) Season 98 men’s basketball tournament sa The Arena sa San Juan City.
Magtutuos ang Knights at Cardinals sa alas-3 ng hapon.
Isa lamang ang laro ngayong araw matapos kanselahin ng NCAA management committee ang laban ng San Sebastian College-Recoletos at Emilio Aguinaldo College dahil sa safety and health protocols.
Ito ang muling paghaharap ng Letran at Mapua matapos ang kanilang pagtutuos sa finals ng Season 97.
Ngunit iba na ang season na ito dahil wala na sa lineup ng Knights si Rookie-MVP awardee Rhenz Abando na nagpasyang lumundag na sa professional basketball.
Wala na rin si Jeo Ambohot na nasa Converge na sa PBA. Kaya naman malaki ang adjustments ng Knights para punan ang nabakanteng puwesto nina Abando at Ambohot.
Kasalukuyang may 2-1 rekord ang Letran para sa solong ikatlong puwesto sa ilalim ng College of Saint Benilde at Lyceum of the Philippines University na may parehong 3-1 kartada.
Sa kanilang huling laro, dinungisan ng Knights ang malinis na rekord ng Blazers sa pamamagitan ng 80-75 panalo.
Umaasa si Letran head coach Bonnie Tan na mas magiging solido ang laro ng kanyang bataan sa oras na makaharap nito ang Mapua.
“We expect a tough game again against Mapua, almost all of the games are crucial in the start of the season,” ani Letran head coach Bonnie Tan.
Sasandalan ng Letran sina Brent Paraiso at Fran Yu na naasahan ng husto ng kanilang tropa sa kanilang huling laro.
“I told my players that our games are going to trend and we hope that we’re going to trend in the win column, not in the loss. Mapua is tough and an experienced team. Hopefully, we can execute a good game plan against Mapua,” ani Tan.
- Latest
