Miller binuhat ang FiberXers
MANILA, Philippines — Binalewala ng Converge ang eksplosibong laro ni balik-import Lester Prosper para sa Terrafirma matapos angkinin ang 124-110 panalo sa 2022 PBA Commissioner’s Cup kahapon sa Philsports Arena sa Pasig City.
Tumipa si FiberXers import Quincy Miller ng 38 points, 16 rebounds, 5 assists at 3 blocks para sa matagumpay na PBA coaching debut ni Aldin Ayo.
“We started flat, especially in the first quarter and we couldn’t convert our shots,” sabi ni Ayo. “But I told them that those are good shots, so keep on shooting.”
Umiskor si Maverick Ahanmisi ng 18 markers at may 13, 12, tig-11 at 10 points sina Justin Araña, RK Ilagan, Jeron Teng, Alex Stockton at Aljun Melecio, ayon sa pagkakasunod.
Nawalang-saysay ang hinakot na 43 points at 25 boards ng Indonesian naturalized center na si Prosper sa panig ng Dyip.
Ipinalasap din ng Converge ang ika-17 sunod na kamalasan ng Terrafirma, kasama rito ang 0-11 baraha sa nakaraang 2022 PBA Philippine Cup.
Kinuha ng FiberXers ang 16-point lead, 89-73, mula sa dalawang free throws ni Miller, naglaro sa NBA para sa Denver Nuggets, Detroit Pistons at Sacramento Kings, sa third period.
Nagawa naman itong putulin ng Dyip sa 92-100 buhat sa triple ni Alex Cabagnot sa 7:59 minuto ng fourth quarter.
Ngunit naglunsad ang Converge ng 13-3 atake kasama ang three-point play ni Melecio para muling makalayo sa 113-95 sa huling 5:29 minuto ng laro.
Mula rito ay hindi na nakabangon ang Terrafirma.
- Latest