Memorial wall ni Lydia ilalagay sa POC museum
MANILA, Philippines — Maglalagay ang Philippine Olympic Committee (POC) ng isang memorial wall para gunitain ang mga tagumpay ni Asia’s Sprint Queen Lydia de Vega sa itatayong POC Museum sa New Clark City sa Capas, Tarlac.
“Lydia’s legacy will forever be remembered. So we, the POC, are planning to put all her achievements on a wall inside the Olympic museum,” sabi kahapon ni POC president Abraham “Bambol” Tolentino.
Ito ang ipinangako ni Tolentino sa ina ni De Vega na si Mary at sa kanyang anak na si Stephanie Mercado-Koenigswarter matapos bumisita sa Heritage Park sa Taguig City noong Sabado.
Inaasahan nang magsisimula ang pagpapatayo sa POC headquarters sa New Clark City na naging venue ng athletics event ng 2019 Southeast Asian Games.
Nagdomina ang tubong Meycauayan, Bulacan sprinter sa track and field matapos itakbo ang back-to-back gold medals sa 100-meter dash sa Asian Games sa New Delhi, India noong 1982 at sa Seoul, Korea noong 1986.
Kumolekta rin siya ng dalawang ginto sa 100m at dalawa sa 200m sa Asian championships sa Singapore noong 1983 at sa Kuwait noong 1987.
May siyam rin siyang SEA Games gold medals mula noong 1983 hanggang 1987.
- Latest
