Bigating supporter ng sports
Pagkatapos masibak ang tropang Choco Mucho ni Deanna Wong sa semifinals ng PVL Invitational Conference, alam kong maraming nalungkot, pero may ikinatuwa ako.
Nakakatuwang very much appreciated ni President Bongbong Marcos, Jr. ang pagkapanalo ni Dave “Dobermann” Apolinario ng International Boxing Organization world flyweight title kamakailan.
Minor title lang ang napanalunan ni Apolinario, pero siya ang nagbigay sa atin ng pag-asa na madaragdagan ang mga pambato nating boxers para magkaroon ulit tayo ng world boxing champions matapos maubos isa-isa ang mga world boxing title-holders natin.
Malabo nang makabalik si Manny Pacquiao pero puwede pa namang bumawi ang mga dating world titlists na sina Nonito Donaire, Jr., Johnriel Casimero, Jerwin Ancajas at Donnie Nietes, Mark Magsayo at Rene Cuarto.
Pero mas nakakatuwang malaman na may big supporter hindi lamang ang mga boxers kundi ang lahat ng mga atleta sa katauhan ng walang iba kundi si Pangulong Bongbong Marcos, Jr.
Masaya siya at proud sa panalo ni Apolinario na nag-courtesy call sa kanya sa Malakanyang.
Sa Facebook ni Pangulong Marcos kung saan binati at ipinagmalaki niya si Apolinario, iginiit niya ang suporta sa mga atleta,
“Ang kanyang (Apolinario) dedikasyon at pagsusumikap na ipinamalas sa larangan ng boksing ay di matatawaran at karapat-dapat lamang na ipagmalaki. Makakaasa po kayo na ating susuportahan ang mga susunod na laban ng bawat atletang Pilipino.”
- Latest
