MANILA, Philippines — Matapos ang bakbakan sa cheerdance, magpapatuloy ang aksyon sa UAAP women’s volleyball tournament sa Huwebes tampok ang apat na bakbakan sa Mall of Asia Arena sa Pasay City.
Unang sasalang ang Adamson University at University of Santo Tomas sa alas-10 ng umaga kasunod ang University of the East at University of the Philippines sa alas-12:30 ng tanghali.
Masisilayan naman sa pang-hapon na laro ang duwelo ng Far Eastern University at reigning champion Ateneo de Manila University sa alas-4.
Inaabangan na ang pagtutuos ng National University at De La Salle University sa alas-6:30 ng gabi.
Namamayagpag ang Lady Bulldogs na may imakuladang 7-0 rekord — ang pinakamagandang baraha nito sa first round sa kasaysayan ng kanilang paglalaro sa liga.
Pumapangalawa naman ang Tigresses at Lady Spikers na may parehong 5-2 baraha habang nasa ikaapat ang Lady Falcons na may 4-3 kartada.
Bagsak sa bottom four ang Lady Eagles na may 3-4 marka katulad ng rekord ng Lady Maroons para pagsosyohan ang No. 5 spot.
Nasa ikaapito ang Lady Tamaraws na may 1-6 marka at pinakahuli ang Lady Warriors na wala pang panalo sa pitong laro.
Sisikapin ng NU na maipagpatuloy ang dominasyon nito sa second round lalo pa’t inaasahang mas titindi ang labanan para sa Final Four slots.