Yulo tatanggap ng P1.8 milyong cash incentives
MANILA, Philippines — Humigit-kumulang sa P1.8 milyon ang matatanggap ni two-time world champion Caloy Yulo matapos ang kanyang kampanya sa 31st Southeast Asian Games sa Hanoi, Vietnam.
Kumolekta ang 22-anyos na Pinoy gymnast ng limang gold medals sa men’s floor exercise, vault, still rings, horizontal bar at individual all-around at may dalawang silver sa team event at parallel bars.
Sa pommel horse lamang siya hindi nakahablot ng anumang medalya. Ang isang gold medal sa SEA Games ay may katumbas na cash incentive na P300,000 habang ang silver at bronze ay P150,000 at P60,000, ayon sa pagkakasunod.
Sa team events ay maghahati naman ang mga miyembro ng koponan sa insentibo.
Noong 2019 Manila SEA Games ay nagsubi si Yulo ng dalawang gold at limang silver medals.
Sa kanyang pagbabalik sa Japan kasama si Japanese coach Munehiro Kugimiya ay kaagad sasalang sa ensayo ang Batang Maynila bilang preparasyon sa mga lalahukang torneo ngayong taon.
Isa sa mga ito ay ang Asian Gymnastics Championships sa Hunyo 15-18 sa Doha, Qatar na qualifying tournament para sa 41st FIG Artistic Gymnastics World Championships sa Liverpool, England sa Oktubre.
Humakot ang national gymnastics team ng 7 golds, 4 silvers at 1 bronze sa kanilang kampanya sa Vietnam SEA Games kasama ang dalawang ginto ni Fil-Am Aleah Finnegan sa vault at women’s team event.
- Latest
