Bucks nakauna sa Celtics
Warriors tinakasan naman ang Grizzlies
BOSTON — Nagposte si Giannis Antetokounmpo ng triple-double na 24 points, 13 rebounds at 12 assists para igiya ang nagdedepensang Milwaukee Bucks sa 101-89 paggiba sa Celtics sa Game One ng kanilang Eastern Conference semifinals series.
Ito ang kanyang ikalawang career postseason triple-double para sa 1-0 lead ng Milwaukee sa kanilang best-of-seven showdown ng Boston.
“That’s just pure talent, just pure instinct,” sabi ni Bucks coach Mike Budenholzer kay Antetokounmpo. “He’s a great player. He does things that are unique and special and timely. ”
Nagtala si guard Jrue Holiday ng 25 points at 10 rebounds at nag-ambag si Bobby Portis ng 15 points at 11 boards.
Pinamunuan ni Jayson Tatum ang Celtics sa kanyang 21 points at may tig-12 markers sina Jaylen Brown at Al Horford.
Matapos patahimikin sina Kevin Durant at Kyrie Irving sa kanilang four-game sweep sa Brooklyn Nets sa first round ay bigo naman ang Boston na pigilin si Antetokounmpo.
Iniskor ni Antetokounmpo ang walong sunod na puntos ng Milwaukee sa pagtatapos ng first half para sa kanilang double-digit lead.
Nakalapit ang Celtics sa seven-point deficit sa huling minuto ng third quarter bago muling nakalayo ang Bucks tampok ang alley-oop dunk ng ‘Greek Freak’ sa kanyang sarili para sa kanilang 94-78 abante.
Sa Memphis, nagpasabog si Jordan Poole ng career-high na 31 points mula sa bench tampok ang playoff-best na limang triples sa 117-116 pagtakas ng Golden State Warriors sa Grizzlies sa series opener ng kanilang Western Conference semifinals series.
Nag-ambag ng 24 markers si Stephen Curry.
Ipinasok ni Klay Thompson ang go-ahead triple sa huling 36 segundo ng final canto para sa one-point lead ng Golden State .
Mintis naman ang layup ni Ja Morant sa huling posesyon ng Memphis.
- Latest
