Beermen, Fuel Masters maghihiwalay ng landas
MANILA, Philippines — Pupuntiryahin ng San Miguel ang kanilang ikalawang sunod na panalo para makatabla sa No. 4 spot sa pagsagupa sa Phoenix sa PBA Governors’ Cup sa Ynares Center, Antipolo City.
Magtutuos ang Beermen at Fuel Masters ngayong alas-6 ng gabi matapos ang bakbakan ng inspiradong Alaska Aces at NLEX Road Warriors sa alas-3 ng hapon.
Kasalukuyang magkasosyo ang San Miguel at Phoenix sa No. 5 sa magkatulad nilang 4-3 record at kapwa determinadong palakasin ang kanilang mga tsansa sa quarterfinals.
Tinapik ng Beermen ang five-year NBA veteran na si Shabazz Muhammad para palitan si Orlando Johnson na naglista ng 31 points, 10 rebounds at 8 assists sa kanilang 110-102 panalo sa nagdedepensang Ginebra Gin Kings noong Linggo.
Muli namang babanderahan ni Dominique Sutton ang Fuel Masters na nakalasap ng 83-103 kabiguan sa Magnolia Hotshots.
Sa unang laro, pupuntiryahin ng Aces ang kanilang ikaapat na sunod na ratsada sa pagharap sa Road Warriors.
“They have a phenomenal import with very good local support. They’re always a tough opponent,” ani Alaska coach Jeff Cariaso kay KJ McDaniels ng NLEX na target ang back-to-back wins.
Itatapat ng Alaska si Ola Ashaolu kay McDaniels at muling sasandal kay guard Jeron Teng na humataw ng career-high 30 points sa kanilang come-from-behind 102-97 win sa Terrafirma noong Sabado.
- Latest