Pinoy players magsasama-sama sa isang team
Japan B. League All-Stars Game
MANILA, Philippines — Magsasama-sama ang mga Filipino imports sa isang koponan na Asia All-Stars sa inaabangang 2022 Japan B. League All-Star Game sa Enero 14 hanggang 15 sa Okinawa Arena.
Babandera rito sina Kiefer Ravena ng Shiga Lakestars at Ray Parks Jr. ng Nagoya Diamond Dolphins kasama ang anim pang Pinoy standouts na nagsisilbing reinforcements sa B. League sa ilalim ng Asian Player Quota program.
Kasama rin sina Kobe Paras ng Niigata Albirex BB, Dwight Ramos ng Toyama Grouses, Javi Gomez de Liaño ng Ibaraki Robots at Thirdy Ravena ng San-en NeoPhoenix na siyang naging unang Pinoy import sa Japan noong nakaraang taon.
Bagama’t sa Division II naglalaro ay sasalang din sa Asia All-Stars sina Juan Gomez de Liaño ng Earthfriends Tokyo Z at Kemark Cariño ng Aomori Wat’s.
Makakasama nila ang iba pang Asian stalwarts na sina Wang Weijia (Akita Northern Happinets) ng China, Brandon Jawato (Utsunomiya Brex) ng Indonesia, Yang Jae-min (Shinshu Brave Warriors) ng South Korea, Lin Chih-wei (Rizing Zephyr Fukuoka) ng Chinese Taipei at Liu Jin (Nishinomiya Storks) ng China.
Makakalaban nila ang B. League Rising Stars na binubuo ng Japanese standouts kabilang na si Matthew Aquino ng Shinshu Brave Warriors na nag-lalaro bilang local player sa B. League dahil sa kanyang Japanese heritage.
Sa Enero 14 gaganapin ang kanilang duwelo bago ang mismong All-Star Game sa Enero 15 tampok ang B. White at B. Black teams.
Sasabak din sa side events ang ilang Pinoy players sa pangunguna ni Paras na kasali sa Dunk Contest.
Sa Three-Point Contest naman sasalang si Javi Gomez de Liaño habang sa Skills Challenge sina Kiefer at Thirdy.
- Latest