Jazz natakasan ang Cavaliers

CLEVELAND — Nagpasabog si Donovan Mitchell ng 35 points para banderahan ang 109-108 pagtakas ng Utah Jazz sa Cavaliers diretso sa kanilang ikaapat na sunod na arangkada.

Sa pangunguna ni Mitchell ay napanatili ng Jazz (16-7) ang pagsosolo sa No. 3 spot sa Western Conference sa ilalim ng Golden State Warriors (19-4) at Phoenix Suns (19-4).

Nagtapos naman ang four-game winning streak ng Cavaliers (13-11).

Naglista rin si Mitchell ng 6 assists, 3 rebounds at 1 steal para sa Jazz na nakahugot kay Rudy Gobert ng 20 rebounds at 5 blocks, habang may 16 at 15 markers sina Bojan Bogdanovic at Rudy Gay, ayon sa pagkakasunod.

Kumonekta ang Utah ng 20 three-pointers at nagtayo ng 15-point lead sa fourth quarter bago nakatabla ang Cleveland sa 97-97 sa 8:43 minuto nito mula sa scoop shot ni Ricky Rubio.

Naimintis ni Darius Garland ang potensyal na game-winner pati na ang tip in ni Jarrett Allen para sa Cavaliers sa huling 2.9 segundo ng laro matapos masupalpal ni Evan Mobley si Mitchell sa posesyon ng Jazz.

Sa Atlanta, umiskor si Miles Bridges ng 32 points sa paggiya sa Charlotte Hornets (14-11) sa 130-127 pag-eskapo sa Hawks (12-12).

Inilagay sa NBA health and safety protocols sina Hornets players LaMelo Ball, Terry Rozier, Mason Plumlee at Jalen McDaniels.

Nagposte si forward John Collins ng season-best 31 points at 12 rebounds sa panig ng Hawks.

Sa Toronto, nagtala si Pascal Siakam ng 31 poin3ts sa 102-90 pananaig ng Raptors (11-13) sa Washington Wizards (14-10).

Sa Houston, umiskor sina Eric Gordon at Christian Wood ng tig-23 points para pamunuan ang Rockets (7-16) sa 118-108 pagpapatumba sa New Orleans Pelicans (7-19).

Ito ang ikaanim na sunod na pananalasa ng Houston.

Pinamunuan ni Brandon Ingram ang New Orleans sa kanyang season-high 40 points, habang nagtala si Jonas Valanciunas ng 17 points at 10 rebounds.