Ancajas target agawin ang WBO belt ni Ioka
MANILA, Philippines — Desidido si International Boxing Federation (IBF) junior bantamweight champion Jerwin Ancajas na maagaw ang korona ni World Boxing Organization (WBO) junior bantamweight champion Kazuto Ioka ng Japan.
Sasambulat ang unification bout nina Ancajas at Ioka sa Disyembre 31 sa Ota City General Gymnasium sa Tokyo.
“Bihira lang na mabigyan ng chance para sa isang unification fight kaya doble kayod ako sa training para makuha ko ang resultang tinatarget ko,” ani Ancajas.
Dahil dito, nagdesisyon ang kampo ni Ancajas na maaga itong magtungo sa Japan para sa acclimatization.
Hangad ni Ancajas na makundisyon ang kanyang katawan sa lamig ng temperatura sa Japan para sa kanyang laban kay Ioka.
Hindi naman na bago si Ancajas sa malamig na panahon dahil makailang ulit na itong nagsanay sa Amerika na may parehong klima.
Ngunit inaasahang mas lalamig pa ang klima sa Japan sa buong Disyembre.
Pagdating sa Japan, kailangan munang sumailalim sa quarantine period ang Team Ancajas sa loob ng tatlong araw.
Kailangan din na negatibo ang swab test ng bawat miyembro ng team bago tuluyang makapag-ensayo sa Japan.
Masaya ang Team Ancajas sa blockbuster fight ng Pinoy champion.
Matagal-tagal ding naghintay si Ancajas para makuha ito.
Kaya naman inaasahang ibubuhos ni Ancajas ang lahat upang maagaw ang WBO belt ni Ioka.
- Latest