Chery Tiggo lumapit sa semis

MANILA, Philippines — Dinomina ng Chery Tiggo ang Black Mamba-Army, 25-16, 25-16, 25-21, upang makalapit sa semis spot sa Premier Volleyball League (PVL) Open Conference kahapon sa PCV Socio-Civic Cultural Center sa Bacarra, Ilocos Norte.

Maganda ang kontribusyon ng lahat ng miyembro ng Crossovers sa pangunguna ni outside hitter Dindin Santiago-Manabat na nagpasabog ng 15 puntos mula sa 13 attacks at dalawang aces.

Ang panalo ang nagdala sa Chery Tiggo sa 6-2 rekord para muling masolo ang No. 3 spot na lalo pang nagpatatag sa kanilang pag-asang makapasok sa Final Four.

Tuluyan nang napasuko ang Lady Troopers sa semis race nang mahulog ito sa 2-5 baraha.

Samantala, mamadaliin na ang pagtapos sa liga kung saan aaraw-arawin na ang mga laro simula ngayon  hanggang matapos ang season na pinakamatagal na hanggang Agosto 13.