Gilas kinapos sa Jordan Tourney

MANILA, Philippines — Nabigong makapasok sa finals ang Gilas Pilipinas matapos ang 84-74 kabiguan sa Jordan Team A sa semifinals ng 2021 King Abdullah Cup sa Prince Hamzah Hall sa Amman, Jordan.

Tanging si naturalized player Ange Koaume lang ang nakapagpakitang-gilas para sa Nationals sa kanyang 20 markers at anim na rebounds.

Ito na ang ikalawang sunod na kabiguan ng Gilas sa Jordan Team A matapos ang 72-84 pagkatalo sa elimination round.

Nagkasya lang sa siyam na puntos si Jordan Heading habang may tig-walong markers sina Thirdy Ravena at Dave Ildefonso para sa Gilas na nahulog sa bronze medal match.

Sinasagupa pa ng Gilas ang Tunisia sa battle-for-third as of press time. Nauna nang tinalo ng Gilas ang Tunisia, 74-73, sa elims.

Magtatagisan naman sa kampeonato ang Jordan Team A at Egypt na ginapi ang Tunisia sa kanilang semis match, 80-71.