Gilas swak na sa semis

MANILA, Philippines — Swak na ang Gilas Pilipinas sa semifinals ng 2021 King Abdullah Cup matapos ang dikit na 74-73 panalo sa overtime kontra sa Tunisia sa Prince Hamza Hall sa Jordan kamakalawa ng gabi.

Nagbuslo ng game-winning freethrow si Thirdy Ravena habang natapal ni naturalized player Ange Kouame ang huling bira ng Tunisia upang masiguro ang dikit na panalo.

Umangat sa 2-1 baraha ang Nationals at nakaselyo ng puwesto sa Final Four kasama ang Egypt (3-0), Jordan (2-1) at Tunisia (1-2).

Trumangko sa Gilas si Kouame sa nahakot na 12 puntos at limang supalpal habang may 7 points si Ravena. Nagambag din ng 11 puntos si Dwight Ramos.

Huling assignment ng Gilas as of presstime ang Jordan Team A na sinilat ng Egypt, 67-79.