US Olympic basketball team buo na
MIAMI — Pormal nang tinanggap ni Fil-American Heat coach Erik Spoelstra ang imbitasyon para sumama sa USA Basketball coaching staff para sa preparasyon sa 2021 Olympic Games sa Tokyo, Japan.
Si Spoelstra ang gigiya sa US select team — grupo ng mga players na makikipag-ensayo at makikipaglaro sa Olympic squad na hahawakan ni head coach Gregg Popovich ng San Antonio Spurs.
Babanderahan ni Kevin Durant ng Brooklyn Nets ang Team USA sa pagdedepensa ng korona sa 2021 Olympic Games sa Tokyo, Japan.
Makakasama uli ni Durant sa ikatlong sunod na pagkakataon sa US Olympic squad si Golden State Warriors forward Draymond Green bukod pa kina Damian Lillard ng Portland Trail Blazers, Bradley Beal ng Washington Wizards, Bam Adebayo ng Miami Heat, Jayson Tatum ng Boston Celtics at Kevin Love ng Cleveland Cavaliers.
Nasa grupo rin sina Bucks stars Khris Middleton at Jrue Holiday kasama si Devin Booker ng Phoenix na kasalukuyang naglalaban sa Western Conference Finals.
- Latest