Clippers swak sa West Finals
LOS ANGELES — Dinispatsa ng Clippers ang Utah Jazz sa Game Six, 131-119, para labanan ang Phoenix Suns sa Western Conference Finals.
Nagpasabog si Terance Mann ng career-high 39 points para sa pag-abante ng Clippers sa conference finals sa unang pagkakataon sa kanilang 51-year franchise history.
Isinara ng Los Angeles ang kanilang semis wars ng Utah sa 4-2.
Nakatakda ang Game One ng Clippers at Suns bukas sa Phoenix.
Tumipa si Paul George ng 28 points at may 27 markers si Reggie Jackson para sa ikalawang sunod na panalo ng Los Angeles sa Utah sa kabila ng hindi paglalaro si All-Star forward Kawhi Leonard dahil sa sprained right knee.
Mula sa 25-point deficit sa third quarter ay inagaw ng Clippers ang 107-106 abante sa huling walong minuto ng fourth period na hindi na nila isinuko.
Binanderahan ni Donovan Mitchell ang Jazz sa kanyang 39 points kasunod ang tig-21 markers nina Fil-Am at NBA Sixth Man of the Year Jordan Clarkson at Royce O’Neale.
Sa Atlanta, itinabla ng Philadelphia 76ers ang kanilang Eastern Conference semis duel ng Hawks sa 3-3 matapos kunin ang 104-99 panalo sa Game Six.
Nagsalpak si Seth Curry ng anim na 3-pointers para sa kanyang 24 points at humakot si Joel Embiid ng 22 points at 13 rebounds.
Isinalpak ni Tobias Harris ang apat na free throws sa huling 13 segundo para sa pagresbak ng 76ers sa Hawks.
- Latest
