Nets-Bucks sa Game 7

MILWAUKEE — Kumamada si Khris Middleton ng 38 points at nagdagdag si Giannis Antetokounmpo ng 30 markers para pamunuan ang Bucks sa 104-89 pagresbak sa Brooklyn Nets sa Game Six ng kanilang Eastern Conference semifinals series.

Nagtabla sa 3-3, dadalhin ang Game Seven sa Brooklyn bukas kung saan ang mananalo ang sasagupa sa mananaig sa semis duel ng Atlanta Hawks at Philadelphia 76ers para sa conference finals.

“Both teams, it’s win or go home,” sabi ni Middleton, naglista rin ng 10 rebounds, 5 assists at 5 steals. “That’s what Game 7’s all about. That’s what players love about it. I’m sure the fans love it, too.”

Bumangon ang Milwaukee mula sa naunang 108-114 kabiguan sa Game Five kung saan nagposte si Kevin Durant ng triple-double na 49 points, 17 rebounds at 10 assists.

Naisuko ng Bucks ang itinayong 14-point lead sa third period at hinayaan ang Nets na makadikit sa 77-82 mula sa three-pointer ni Joe Harris sa 8:41 minuto ng fourth quarter.

Isang 14-0 atake ang pinamunuan nina Middleton at Antetokounmpo para muling ilayo ang Milwaukee at selyuhan ang kanilang panalo.

Binanderahan ni Durant ang Brooklyn sa kanyang 32 points at 11 rebounds at nag-ambag si James Harden, nagmula sa hamstring injury, ng 16 markers.

Samantala, nagbitiw si Rick Carlisle bilang head coach ng Dallas Mavericks na nabigo niyang maipasok sa semifinal round.

Sa kanyang 13 season ay iginiya ni Carlisle ang Mavericks sa 2011 NBA title na pinamunuan ni NBA legend Dirk Nowitzki.

Ang Mavericks ang pang-pitong NBA team na may coaching vacancy matapos ang New Orleans Pelicans, Washington Wizards, Orlando Magic, Indiana Pacers, Portland Trail Blazers at Boston Celtics.